“Sevimli fotolarım” silsiləsindən

”Sevimli fotolarım” silsiləsindən ”Bağban Oğuz”

Uşaq dövlətin gələcəyidir. ”Uşaq pulu” dövlətin öz gələcəyinə investisiyasıdır. Gələcəyi düşünən dövlətlər öz vətəndaşı ilə münasibəti o doğulan gündən qarşılıqlı etimad fundamenti əsasında qurur.

Oğuz İsveçdə doğulan azərbaycanlı uşaqlardan biridir. İsveç dövləti hər ay onu görə ailəsinə 1250 kron ”uşaq pulu” yardımı edir, hardasa 125 avro. İsveç hər il ”barnbidrag” deyilən uşaq pulu üçün 33 milyard kronadək (3,3 milyard avro) büdcədən vəsait ayırır.

Uşaq pulu sıradan yardım deyil, gələcəyə investisiyadı!

”Sevimli fotolarım” silsiləsindən ”Bağban Oğuz”

***

“Sevimli fotolarım” silsiləsindən “İsveç kilsəsi”

Qonşuluqda İris adlı çox yaşlı bir qarı olur. Hər bazar günü yaxınlıqdakı kilsəyə ibadətə gedir. Bu gün yenə qarşılaşdıq. Salamlaşanda dedim, dualarında – İsa Məsihlə söhbətində məndən ona salam de. Nurlu çöhrəsində gözləri güldü, elə bil bir cüt gül açdı üzündə. “Sağ ol, mütləq deyərəm”, dedi.

Ayrıldıq. İndi düşünürəm, görən məscidə ibadətə gedən mömin bir müsəlman yaxınımdan xahiş etsəm, dualarında məndən Məhəmmədə (ə.s.) salam de, cavabı nə olar?

***

“Sevimli fotolarım” silsiləsindən “Ərimgəldi”

Bu fotonu Xınalıqda çəkmişəm. ”Ərimgəldi”ni xatırladır mənə. ”Ərimgəldi” Şuşanın girəcəyində üzü aran Qarabağa baxan bir qayanın adıdı. Uşaq vaxtı o qayanı atam göstərmişdi bizə. Əvvəllər ərli qadınlar axşamüstü o qayaya çıxıb arana səfərdən, aşağı kəndlərdə əkin-biçindən qayıdan ərlərini gözləyərmişlər.

40-50 ildən sonra Qarabağda yaddaş ləpirləriylə gəzib bir də görmək istədiyim yerlərin uzun siyahısındadı “Ərimgəldi”.

Sağlıq olsun!