«Ağdam – Qafqaz Xirosiması və ruhlar şəhəri» sərgisi Rəssamlar İttibaqında

İyulun 23-də Bakıda və ölkənin digər yerlərində Ağdamın işğalının 17-ci ili yad edilib. Bakıda müvəqqəti məskunlaşmış ağdamlılar, eləcə də bir çox qarabağlılar günün birinci yarısı bu münasibətlə Şəhidlər Xiyabanına yığışıblar.

Günün ikinci yarısı isə Rəssamlar İttifaqının Vəcihə Səmədova adına salonunda «Ağdam – Qafqaz Xirosiması və ruhlar şəhəri» adlı fotoşərgi açılıb. QHT-lərə Dövlət Dəstəyi Şurasının maliyyə dəstəyi ilə «İnam» Plüralizm Mərkəzinin təşkil etdiyi sərgidə Ağdamın işğaldan əvvəl və sonrakı şəkilləri, eləcə də «Qafqaz Xirosiması» filmi nümayiş etdirilib.

Açılışda ölkədəki diplomatik korpusun və beynəlxalq təşkilatların nümayəndələri, millət vəkilləri, elm, mədəniyyət xadimləri, QHT təmsilçiləri və sadə vətəndaşlar iştirak ediblər.

17 il bundan əvvəl Ağdam Ermənistan Silahlı Qüvvələri tərəfindən işğal edilib.

Azadlıq radiosu

Agdam – The Caucasian Hiroshima and Ghosts Town

Mayın 18-də Ağdamın Quzanlı qəsəbəsində «Ağdam – Qafqaz Xirosiması və ruhlar şəhəri» adlı sərgisinin açılışı olub. Oxumağa davam et →

Berlində “Ağdam Qafqaz Xirosiması və ruhlar şəhəri”

Oktyabrın 28-də Almaniya paytaxtı Berlində “Ağdam – Qafqaz Xirosiması” fotosərgisi keçirilib. Sərginin açılışında çıxış edən Azərbaycanın Almaniyadakı səfiri Pərviz Şahbazov Ermənistanın Azərbaycana təcavüzündən danışıb. O qeyd edib ki, BMT-nin torpaqların dərhal azad edilməsi barədə 4 qətnaməsinə baxmayaraq 17 ildir Azərbaycan ərazilərinin beşdə biri işğaldadır.

Sərginin təşkilatçısı “İnam” Plüralizm Mərkəzinin sədri Vahid Qazi doğulub boya-başa Ağdamın Yer üzündən silinib xarabazarlığa çevrilməsinin onun kimi minlərlə insanın həyatına təsirindən,  talelərdəki acı fəsadlarından danışıb.

“Qarabağ Azərbaycanın mədəniyyət mərkəzidir, xalqın mənəvi tarixinin bir parçasıdır, onun tənəffüs orqanıdır. Almaniyanı Bavariyasız, Fransanı Normandiyasız təsəvvür etmək mümkün olmadığı kimi Azərbaycanı da Qarabağsız təsəvvür etmək olmaz. Avropa kommunizmin dəmir divarları ilə ikiyə bölünəndə Papa II İohan Pavel bu məşhur sözləri demişdi: “Avropa hər iki ciyəri ilə nəfəs almalıdır!”.

Bu gün Azərbaycan da o dövrün Avropası kimi tək ciyərlə nəfəs alır” deyən” V. Qazi sonda iştirakçıların çoxsaylı suallarına cavab verib.

Azərbaycanın Almaniyadakı səfirliyinin dəstəyi ilə keçirilən sərgidə Ağdamın işğaldan əvvəl və işğaldan sonrakı mənzərələri əks olunan 60 foto, onun indiki durumunu Xirosimanın atom partlayışından sonrakı vəziyyətinə oxşadan xarici jurnalistlərdən sitatlar yazılmış plakatlar nümayiş etdirilib, Ağdamın dünəni və bu günündən bəhs edən buklet paylanıb. Sərgi zamanı alman tamaşaçılara “Qafqaz Xirosiması” filmi təqdim olunub.

Sərgiyə qatılan müxtəlif təşkilat nümayəndələri fotoların Almaniyanın digər şəhərlərində də nümayiş olunması təşəbbüsü ilə çıxış ediblər. Sərginin Ştutqart və digər şəhərlərdə keçirilməsi qərara alınıb.

Modern.az

P.S. Sərgi Kanadanın Ottova şəhərində də keçirilib.

Berlin. 28 oktyabr 2010